جدہ میں پاکستان کے قونصل جنرل جناب خالد مجید نے سعودی عرب کے 92ویں قومی دن کے موقع پر اپنی رہائش گاہ پر ایک پر وقار استقبالیہ کا اہتمام کیا۔ 23 ستمبر 2022۔

پریس ریلیز

جدہ، 23ستمبر، 2022 جدہ میں پاکستان کے قونصل جنرل جناب خالد مجید نے سعودی عرب کے 92ویں قومی دن کے موقع پر اپنی رہائش گاہ پر ایک پر وقار استقبالیہ کا اہتمام کیا۔ اس تقریب میں اعلیٰ سطح کے سفارت کار، معروف پاکستانی اور سعودی کاروباری شخصیات، پاکستانی اور سعودی کمیونٹی کے ارکان اور سعودی اور پاکستانی میڈیا کے نمائندگان موجود تھے۔

وزارت خارجہ کے ڈائریکٹر جناب فرید الحزمی اس تقریب کے مہمان خصوصی تھے۔ دیگر شرکاء میں شہزادی جوہرہ، ڈائریکٹر جنرل منسٹری آف میڈیا عبدالخالق زھرانی، اور جدہ چیمبر آف کامرس کے اعلی عہدے داران شامل تھے۔

قونصل جنرل نے اس موقع پر سعودی عرب کی حکومت اور عوام کو مبارکباد پیش کی اور سعودی عرب کے ساتھ قریبی اور برادرانہ تعلقات کے لیے پاکستان کے مضبوط عزم کا اعادہ کیا۔ انہوں نے خادم حرمین شریفین شاہ سلمان بن عبدالعزیز آل سعود اور ولی عہد شہزادہ محمد بن سلمان کی خطہ اور عالمی امن و استحکام کو فروغ دینے میں اہم کردار کو سراہا۔ انہوں نے مزید کہا کہ اس سال پاکستان اور سعودی عرب کے درمیان سفارتی تعلقات کے 75 سال مکمل ہو رہے ہیں اور ہم باہمی اہداف اور وژن کا اشتراک کرتے ہیں اور آنے والے سالوں میں مضبوط شراکت داری کو فروغ دینے کے لیے پر امید ہیں۔
سعودی عرب کی حکومت کی جانب سے پاکستانی سیلاب زدگان کی بے بھرپور مدد اور تعاون کو سراہتے ہوئے قونصل جنرل نے کہا کہ سعودی عرب کے عوام اور حکومت نے ہمیشہ ضرورت کے وقت پاکستان کا ساتھ دیا ہے اور پاکستانی سیلاب زدگان کی مدد اس ہی سلسلے کی ایک کڑی ہے۔ انہوں نے شرکاء پر زور دیا کہ وہ KSA ریلیف فنڈ میں دل کھول کر حصہ ڈالیں، جو کہ متاثرہ لوگوں کی زندگیوں کی تعمیر نو میں معاون ثابت ہوگا۔ قونصل جنرل نے گزشتہ کئی دہائیوں میں سعودی عرب کی ترقی میں پاکستانیوں کے مثبت کردار کا بھی تذکرہ کیا۔ تقریب کا اختتام سیلاب زدگان کے لیے اجتماعی دعا کے ساتھ ہوا، بعد ازاں سعودیہ کے قومی دن کی مناسبت سے کیک کاٹا گیا۔