کشمیر کی جدوجہد آزادی کی حمایت۔۔ اقوام متحدہ اور عالمی برادری کی اخلاقی اور قانونی ذمہ داری ہے۔ مقررین

کشمیر کی جدوجہد آزادی کی حمایت۔۔ اقوام متحدہ اور عالمی برادری کی اخلاقی اور قانونی ذمہ داری ہے۔ مقررین

جدہ/5 فروری، 2024:

              سعودی عرب میں مقیم کشمیری اور پاکستانی کمیونٹی نے یوم یکجہتی کشمیر روایتی جوش و جذبے کے ساتھ جدہ کے پاکستان ہاؤس میں ایک مرکزی تقریب منعقد کی۔ تقریب میں صدر پاکستان، وزیراعظم پاکستان، وزیراعظم آزاد کشمیر اور پاکستان کے وزیر خارجہ کے خصوصی پیغامات پڑھے گئے ۔

              اس موقع پر مقررین میں معروف سعودی سکالر ڈاکٹر فیض عابدین، چیئرمین کشمیر کمیٹی جدہ جناب مسعود پوری اور اوورسیز جموں و کشمیر کمیٹی کے جناب وقاص عنائت شامل تھے۔ مقررین نے  5 اگست 2019 کے بھارت کے غیر قانونی اور یکطرفہ اقدامات پر روشنی ڈالی اور اس بات پر زور دیا کہ کشمیر کو ایک قلعہ بند جیل میں تبدیل کرنے کے باوجود بھارت آزادی پسند کشمیری عوام کے ناقابل تسخیر جذبے کو شکست نہیں دے سکتا۔ انہوں نے بھارت سے مطالبہ کیا کہ وہ فوری طور پر مقبوضہ کشمیر (IIOJK) میں انسانی حقوق کی سنگین  اور منظم ریاستی سرپرستی میں ہونے والی خلاف ورزیوں کو روکے۔

             قونصل جنرل آف پاکستان جناب خالد مجید نے اپنے خطبہ استقبالیہ میں سعودی قیادت کی جانب سے کشمیر کاز کے لیے مخلصانہ  اورمسلسل حمایت کرنے پر ان کی تعریف کی۔ انہوں نے اس اہم مسئلے کے بارے میں فعال طور پر آگاہی پیدا کرنے میں اسلامی تعاون تنظیم (OIC) کے کردار کی بھی تعریف کی۔ قونصل جنرل نے عالمی برادری اور اقوام متحدہ پر زور دیا کہ وہ اس بات کو یقینی بنانے میں اپنا بھرپور کردار ادا کریں تا کہ کشمیری عوام  اپنے حق خود ارادیت کا استعمال کر سکیں۔

             او آئی سی میں پاکستان کے مستقل نمائندے  سفیر جناب سید محمد فواد شیر نے اس موقع پر خطاب کرتے ہوئے بھارتی فوج کے مظالم اور زمینی حقائق کو تبدیل کرنے کے لیے مقبوضہ کشمیر (IIOJK)  کے خطے میں آبادیاتی تبدیلیاں مسلط کرنے کے بھارت کے منصوبوں پر روشنی ڈالی۔ انہوں نے اس بات پر زور دیا کہ عالمی برادری کو اقوام متحدہ کی قراردادوں کے مطابق کشمیری عوام کے لیے انصاف کو یقینی بنانے کے لیے اکٹھا ہونا چاہیے۔

             اس موقع  پر، بھارتی مقبوضہ کشمیر (IIOJK)  میں رہنے والوں کی حالت زار اور بھارتی فوج کی طرف سے انسانی حقوق کی سنگین خلاف ورزیوں کو اجاگر کرنے والی ایک دستاویزی فلم دکھائی گئی۔ شرکاء اور مقررین نے عالمی برادری اور اقوام متحدہ پر زور دیا کہ وہ کشمیر کے دیرینہ مسئلے کو حل کریں اور غزہ میں فلسطینیوں کی نسل کشی کو روکنے کے لیے بھی فوری اقدامات کریں۔

             تقریب میں جدہ میں مقیم معززین، سیاسی شخصیات اور سول سوسائٹی کی تنظیموں کے ارکان نے شرکت کی اور کشمیریوں کے حق خودارادیت کی جدوجہد کی حمایت جاری رکھنے کے عزم کا اعادہ کیا۔

—

Event Gallery